MORRAOCONTO ᴛᴇᴀᴛʀᴏ ᴇ ᴅᴀɴᴢᴀ somos Rafa Martínez, Lara Pouso e Miguel Gendre.

MORRAOCONTO nace no verán de 2021 en Santiago de Compostela, cando a equipa converxe nun traballo común para o festival USCénica.

A compañía créase como resposta á necesidade de crear unha plataforma de xestión propia coa que levar a cabo diferentes proxectos, partindo das artes escénicas como eixo principal, e diverxendo en distintos eidos como son: a creación escénica, o audiovisual, a música, a danza, a divulgación e a formación.

MORRAOCONTO tenta aportar un valor engadido nas súas propostas escénicas, entendendo os nosos procesos creativos como espazo de colaboración no que traballar con artistas e profesionais de diferentes disciplinas, aos que invitamos a mergullarse no noso imaxinario.

O noso traballo sustentámolo en tres pilares fundamentais:

·Liberdade creativa: Confiamos en poder amosar ao público as nosas inquedanzas como colectivo, explorando novas propostas e tratando sempre de saír da nosa zona de confort.

·Experimentación: Consideramos necesario e valioso o proceso de investigación como parte da creación. Sabemos que os tempos, pola maneira en que funcionan os circuitos, son moi limitados, pero sempre buscamos reservar periodos para a investigación.

·Denuncia social: O teatro e a danza tamén serven como espello para reflectir a sociedade na que vivimos. As cuestións sociais que nos atravesan, tamén atravesan os nosos traballos.